BrushUp-ը (ԲրաշԱփ) ունիվերսալ ուսուցանող սարք է, որն ամրացվում է ցանկացած ատամի խոզանակի և ուղղորդում օգտագործողին ավելի ճիշտ խնամել ատամները։ BrushUp-ն ունի 2 բաղադրիչ, որոնցից առաջինը ամրանում է ատամի խոզանակի բռնակին, մյուսը բջջային հավելված է, որը տեղակայվում է սմարտֆոնում։ Այս երկու միավորները կապի մեջ են միմյանց հետ, սակայն կարող են գործածվել նաև բոլորովին անկախ։ Ատամների մաքրման սխալ տեխնիկա կիրառելիս սարքը ձայնային ազդանշանի միջոցով կզգուշացնի և զերծ կպահի անցանկալի հետևանքներից։ Այսպիսով, օգտագործողների մոտ կձևավորվի ատամների ճիշտ խնամքի ռեֆլեքս:
BrushUp-ը նախատեսված է բոլորի համար, բայց օգտագործողների մեջ որպես առաջնային օղակ համարվում են երեխաները:
BrushUp-ի բջջային հավելվածի միջոցով հնարավոր է արդիականացնել կամ ավելացնել սարքի ֆունկցիոնալությունը, օրինակ, սարքում ավելացնել ատամները լվանալու տևողության հաշվիչ, որով ճշգրիտ ժամանակ կտրամադրվի ատամնաշարի յուրաքանչյուր կողմի լվացմանը: Հավելվածը կարելի է օգտագործել նաև որպես երեխաներին մոտիվացնող միջոց, օրինակ, գործող բոնուսային համակարգերի օգնությամբ (առանց բացթողումների ամենօրյա ատամների խնամքը, ամենաքիչ սխալները և այլն):
Գաղափարից մինչև ստարտափ
Գաղափարն իրականացնող թիմի անդամներից Հասմիկ Մանուկյանը նշում է, որ ԲրաշԱփ սարքի ստեղծման գաղափարը շատ անսպասելի սկիզբ է ունեցել։
Այս տարի գարնանը մասնակցում էի Հայաստանի ամերիկյան համալսարանի կողմից կազմակերպված ձեռներեցության դասընթացին։ Դասերից մեկի ժամանակ մեզ բաժանվեցին թերթիկներ, որոնցից յուրաքանչյուրում նշված էին կոնկրետ ապրանքներ և մենք պետք է նոր գործառույթներ մտածեինք ապրանքների համար, որոնց շնորհիվ գնորդները նախընտրությունը կտային մեր առաջարկած ապրանքին: Խմբերից մեկին բաժին էր ընկել ատամի խոզանակ, և նրանք, որպես նոր գործառույթ, առաջարկեցին խոզանակը դարձնել էկո: Ելնելով իմ փորձից՝ ես հասկացա, որ շատերին չէր գրավի այդ առաջարկը և հենց այդ պահին իմ մոտ միտք հղացավ ստեղծել մի խոզանակ, որը ձայնային ազդանշան կարձակի ատամների լվացման սխալ տեխնիկա կիրառելիս, — պատմում է Հասմիկը։
Գաղափարի իրականացման հիմքում առավել կարևոր մասը հանդիսանում էր տեխնիկական մասը։ Ծրագրի ավարտի օրը Հասմիկը խորհուրդ է հարցնում Աննայից և Արամից (նրանք միասին սովորում էին նույն ծրագրի շրջանակում և այնտեղ էլ ծանոթացել էին), թե արդյոք այդ միտքը հնարավոր է կյանքի կոչել: Գաղափարը նրանց շատ դուր եկավ, և Աննան որոշեց տեխնիկական մասի վերաբերյալ հարցնել իր հայրիկին, ով ինժեներ է։
Մեր ամենահետաքրքիր թարմացումները մենք ուղարկում ենք էլփոստով։
Ստացեք շաբաթական ☑ մեկ թարմացում՝ բաժանորդագրվելով մեզ այստեղ
Աննան, հայրիկից պարզելով, որ գաղափարը տեխնիկապես իրագործելի է, հավանություն է տալիս և առաջարկում պատրաստել ոչ թե խոզանակ, այլ մի սարք, որն ունիվերսալ կլինի բոլոր խոզանակների համար։ Արամի խորհրդով գաղափարը ներկայացվում է Buissup հաքաթոնների նախագծին, որի գրանցմանը հաշված օրեր էին մնացել: Հաքաթոնի ընթացքում թիմը ծանոթանում է նոր ինժեների՝ Վանիկի հետ, ով մեկ գիշերվա ընթացքում պատրաստում է սարքի նախատիպը։
ԲրաշԱփի թիմը
Գաղափարի վրա մեծ խանդավառությամբ աշխատում են բժիշկ ստոմատոլոգ/օրթոդոնտ՝ Հասմիկ Մանուկյանը, 2 փորձառու (10+ տարի) ծրագրավորող՝ Աննա Մալխասյանը և Արամ Գևորգյանը, ինժեներ՝ Վանիկ Տիգրանյանը, ով հաքաթոնից մի քանի օր անց արդեն անցավ ծառայության, սակայն պահպանեց իր մշտական ավագ ինժեների պաշտոնը ապագա ստարտափում։
![BrushUp ստարտափի թիմը Հայաստանի Ամերիկյան Համալսարանում, 2022 հուլիս։ BrushUp Startup team, Armenia](https://intech.am/wp-content/uploads/2022/07/brushup-startup-team.jpg)
BrushUp ստարտափի թիմը Հայաստանի Ամերիկյան Համալսարանում, 2022 հուլիս։
ԲրաշԱփի առաջին քայլերը
Գաղափարն իր առաջին քայլերը արեց Հայ գործարարների միության կողմից կազմակերպված Buissup Hackathon-ի ժամանակ:
Արամի առաջարկով որոշեցինք մասնակցել Buissup հաքաթոնին: Շատ ոգևորված էինք մեր գաղափարով, բայց ինչպես բոլոր գրքերում կամ կինոներում, մենք ևս ունեինք մեր բայցը՝ մենք չունեինք ինժեներ, նշում է Հասմիկը։
Չնայած այս բայցին, միևնույն է թիմը որոշում է մասնակցել՝ հույսով, որ հաքաթոնի ժամանակ նրանց թիմը կհամալրվի, ու հենց այդպես էլ եղավ։ Թիմին միացավ Վանիկը։
Թիմին հաքաթոնի ժամանակ միացած Վանիկը վառվեց մեր գաղափարով և մի գիշերվա ընթացքում ստեղծեց նախատիպը:
Ոգևորված արդյունքով՝ պատրաստվեցինք ելույթին և սկսեցինք անհամբեր սպասել մեր հերթին: Սպասումը բարդ էր, 28 թիմերի մեջ մենք նախավերջինն էինք: Եվ որքան շատ ելույթներ էինք լսում, այնքան հաղթանակի հույսը մարում էր. արժանի թիմերը շատ-շատ էին, — պատմում է Աննան։
Հետևեք մեր թարմացումներին Twitter-ում և LinkedIn-ում
☑ Twitter – https://twitter.com/intechexpress
☑ LinkedIn – https://www.linkedin.com/company/intechexpress
Թիմի հույսը վերջնականապես կնքում է իր վախճանը, երբ նրանց ելույթից ու նախատիպի ցուցադրումից հետո ժյուրին ասաց, որ նրանց հարց չունի:
Մինչ, արդեն հաստատակամորեն պարտված, մշուշի մեջ փորձում էինք հասկանալ, թե ինչ անել հաջորդ քայլը, արդյունքներին սպասելու ժամանակը հատեց և հայտարարեցին հաղթող թիմին: Չենք կարող նկարագրել մեր զարմանքն ու ուրախությունը, երբ հաղթող հայտարարվեց մեր թիմը, — պատմում է Աննան։
Ապագան՝ մոտ ապագայում
![ԲրաշԱփ գաղափարի թիմը՝ Buissup հաքաթոնի հաղթող](https://intech.am/wp-content/uploads/2022/07/brushup-startup-buissup-hackathon.jpg)
ԲրաշԱփ գաղափարի թիմը՝ Buissup հաքաթոնի հաղթող
Մեր հաղթանակը մեզ նվիրեց Buissup Գլոբալ Ֆորումին մասնակցություն, ինչն էլ անմիջապես դարձավ մեր մոտակա ապագայի պլանը: Անպայման մասնակցելու ենք, բայց հուսով ենք արդեն մեր արտադրանքի (սարք + հավելված) առաջին նախնական տարբերակով (եթե հասցնենք): Նաև ուզում ենք հնարավորինս տարածել մեր արտադրանքը ու հասկանալ պահանջարկն ու շուկան:
Մեծ պլաններ ունենք դուրս գալ գլոբալ շուկա, հիմնել Հայաստանում մասսայական արտադրություն և բարձրացնել Հայաստանի ճանաչելիությունը արտադրության ոլորտում նույնպես: Երազում ենք, որ Made In Armenia-ն դառնա ինովացիայի և որակի չափանիշ:
— Արամ ԳևորգյանՄենք դեռ չենք հասել մեր երազանքին, բայց չենք կանգնելու: Ու համոզված ենք, որ եթե չկանգնենք՝ կստացվի 🙂
— Աննա Մալխասյան
BrushUp-ի գաղափարին օգտակար լինել կարող եք նախագծի պրելանչ էջում այստեղ
Photo by R ARCHITECTURE on Unsplash