Հայաստանի Առաջատար տեխնոլոգիաների ձեռնարկությունների միությունը (ԱՏՁՄ) և ՖԵՄԻՆՆՈ մշակութա-նորարարական հարթակը համաձայնության են եկել համագործակցել 2024թ. Նորարարության և Տեխնոլոգիաների Համաշխարհային Համաժողովի (WCIT2024/DigiTec) շրջանակներում: Նրանց նպատակն է ակտիվացնել կանանց մասնակցությունը այս իրադարձությանը:
Այս համագործակցությունը միտված է ընդլայնել կանանց ներգրավվածությունը կոնգրեսում՝ ներառելով և՛ տեղական, և՛ միջազգային մասնակիցներ: Երկու կազմակերպությունները միավորում են իրենց ռեսուրսները և կապերը՝ WCIT2024/DigiTec-ը դարձնելու նշանակալի միջոցառում: Նրանք ցանկանում են ընդգծել կանանց դերը տեխնոլոգիական ոլորտում և Հայաստանը ներկայացնել որպես կանանց նորարարության և առաջնորդության կարևոր կենտրոն:
Հուշագիրը ստորագրվել է WCIT2024/DigiTec-ի կազմկոմիտեի գործադիր տնօրեն Հայկ Կարապետյանի և ՖԵՄԻՆՆՈ-ի հիմնադիր Սեդա Պապոյանի կողմից: Նրանք հակիրճ ելույթով հայտարարել են համաձայնագրի մասին և իրենց պատրաստակամությունը հայտնել համատեղ ջանքերով նպաստել WCIT2024/DigiTec-ի հաջողությանը:
«Ֆեմիննոյի հետ համագործակցության միջոցով մենք նպատակ ունենք հարստացնել
WCIT2024/DigiTec-ի օրակարգը կանանց ավելի մեծ ներկայացվածությամբ: Իմ անձնական փորձից
գիտեմ, որ Հայաստանում ընկերություններում ղեկավար պաշտոնների շուրջ 40 տոկոսը զբաղեցնում
են կանայք: Այս համագործակցության միջոցով մենք ձգտում ենք հարստացնել մեր միջոցառումը՝
ներգրավելով ավելի շատ մասնագետներ, որոնք քննարկումներին կբերեն իրենց մասնագիտական
փորձառությունը: Այս համագործակցությունը երաշխավորում է, որ մեր օրակարգը կլինի ոչ միայն
համապարփակ, այլ նաև բազմազան և ներառական, արտացոլելով կանանց իրական ներուժը
տեխնոլոգիական ոլորտում»,-ասաց WCIT2024//DigiTec-ի կազմկոմիտեի գործադիր տնօրեն Հայկ
Կարապետյանը։
ԱՏՁՄ-ի և ՖԵՄԻՆՆՈ-ի համագործակցությունն ուշադրություն է հրավիրում WCIT2024/DigiTec-ի «ԱԲ-ի կանացի հմայքը» (“The Grace of AI”) հանդիպումների շարքին: Այս միջոցառումները նվիրված են գենդերային հավասարությանը և կանանց տնտեսական հզորացմանը թվային ոլորտում: Նպատակն է ստեղծել ավելի ներառական տեխնոլոգիական միջավայր, որտեղ կանայք կունենան ավելի մեծ ներկայացվածություն և ազդեցություն:
ՖԵՄԻՆՆՈ-ի հիմնադիր Սեդա Պապոյանը նշել է, որ այս համագործակցությունը կարևոր է իրենց կազմակերպության համար: Այն օգնում է ոչ միայն ընդլայնել իրենց ճանաչումը, այլև ուժեղացնել ջանքերը՝ Հայաստանում էական փոփոխություններ իրականացնելու համար: Պապոյանը սա համարում է կարևոր քայլ իրենց առաքելության մեջ՝ ընդլայնելու կանանց հնարավորություններն ու հասնելու ավելի մեծ արդյունքների:
WCIT2024/DigiTec համաժողովը կկայանա 2024 թվականի հոկտեմբերի 4-ից 7-ը Երևանի Կարեն Դեմիրճյանի անվան մարզահամերգային համալիրում: Միջոցառման գլխավոր թեման է՝ «ՄՏՔԻ ՈՒԺԸ. Արհեստական բանականություն՝ սահմաններից այն կողմ՝ էթիկայի շրջանակներում»: Այս թեման ընդգծում է արհեստական բանականության զարգացման և էթիկական նկատառումների միջև հավասարակշռության կարևորությունը:
WCIT2024/DigiTec-ը 2024թ. հոկտեմբերի 4-7-ը Հայաստանը կվերածի տեխնոլոգիական մտքի կենտրոնի: Այս չորսօրյա միջոցառումը կներառի.
- Առաջատար համաշխարհային խոսնակների ելույթներ
- Պանելային քննարկումներ
- B2B հանդիպումներ
- WITSA World Cup ստարտափների մրցույթ
- Նորարարական ցուցադրություններ
- Բիզնես ներկայացումներ
- Սեմինարներ և այլ միջոցառումներ
WCIT 2024 համաժողովի հիմնական նպատակներն են.
- Ցուցադրել Հայաստանի և այլ երկրների տեխնոլոգիական ներուժը ԴիջիԹեք էքսպոյի միջոցով
- Ընդգծել տեղեկատվական տեխնոլոգիաների դերը և տեղեկացնել ԱԲ-ի վերջին ու ապագա զարգացումների մասին
- Ներկայացնել Հայաստանը միջազգային ասպարեզում որպես տարածաշրջանային տեխնոլոգիական հաբ
- Խրախուսել ներդրումները և կարևորել ՏՀՏ լուծումների դերը տարբեր տնտեսություններում
Ակնկալվում է, որ միջոցառմանը կմասնակցի ավելի քան 2,000 միջազգային պատվիրակ՝ ապահովելով լայն աշխարհագրական ներկայացվածություն: WCIT2024/DigiTec-ը ձգտում է դառնալ գլոբալ հարթակ՝ միավորելով տեխնոլոգիական ոլորտի առաջատարներին և նորարարներին:
ՖԵՄԻՆՆՈ-ն հանդիսանում է Հայաստանի և տարածաշրջանի ամենախոշոր հարթակը, որը նվիրված է կանանց և նորարարությանը: Կազմակերպությունն ամեն տարի հուլիսի վերջին Հայաստանում անցկացնում է իր գլխավոր համաժողովը: 2023 թվականից սկսած՝ ՖԵՄԻՆՆՈ-ն ընդլայնել է իր գործունեությունը միջազգային մակարդակով՝ սկսելով կազմակերպել “արբանյակ” համաժողովներ տարբեր երկրներում: Այդպիսի միջոցառումներ արդեն տեղի են ունեցել Սան Ֆրանցիսկոյում և Սիդնեյում, իսկ առաջիկա աշնանը նախատեսվում է անցկացնել Նյու Յորքում:
Նորարարությունների և տեխնոլոգիաների համաշխարհային կոնգրեսը (WCIT) հեղինակավոր միջազգային իրադարձություն է, որը կազմակերպվում է ՏՏ և ծառայությունների համաշխարհային դաշինքի (WITSA) կողմից: Այս կոնգրեսը միավորում է տեխնոլոգիական ոլորտի առաջատարներին, մասնագետներին և կառավարությունների ներկայացուցիչներին աշխարհի տարբեր երկրներից: WCIT-ի նպատակն է քննարկել և ձևավորել տեխնոլոգիաների ապագան, ինչպես նաև վերլուծել դրանց ազդեցությունը հասարակության վրա:
— Advertisement on InTech.am —
